سباقيتي بولونيز

بعد بسم الله السلام عليكم

هذي طريقتي المعتمدة منذ سنوات طويلة في تحضير سباقيتي بولونيز وتجي هايلة
التحضير: اولا تغلي سباقيتي بالماء وملح وقطرات من الزيت لما يطيب شليه بالماء البارد وصفيه وخليه جانبا.

صوص بولونيز: نضع حبة بصلة مسكرفجة+ 3سنات ثوم + ملح+ فلفل اسود + 2مغارف الى 3 زيت في طاجين

حطيهم على نار قليلة قليهم حتى يذبل البصل مبعد ضيفيلوا كمية من اللحم مرحي

وقلي مليح ونتي تحلي في اللحم مرحي مبعد ضيفي مغرف معمرة طماطم مصبرة وحركي لمدة دقيقة كاملة

مبعد ضيفي مغرف فرينة وكذلك خلطي

مبعد مرقي بكمية من الماء لازم المرق يكون بزاف يعني عومي هذاك اللحم

وخليها تطيب لمدة 10الى15د يعني قيس مايطيب اللحم و تعقد المرقة غير شوية يعني المرق يكون كاين
في مول مدهون نقسم السباقيتي الى2 قسم نملحوه ونديروه في المول

ونديرولو كمية من المرق

ونخلط بيدينا حتى تدخل المرقة فسباقيتي مبعد نرش القليل من الجبن مرحي

ثم ندير القسم الثاني من سباقيتي نملحوه

ونسقيه بكامل الصوص

ونرشوا الوجه بجبن مرحي من الافضل قريار وندخلوه للفرن لمدة 25الى30د