الرشتة بالتفصيل الممل

التحضير: 750غ سميد رطب او متوسط+250غ فرينة فلمجموع 1كلغ بين الفرينة والسميد وتقدري ديري سميد وحدو نفس النتيجة+ مغرف اكل ملح+مغرف زيت+الماء وتجمعيها اهم حاجة خليها يابسة يعني العجينة متكونش طرية ولا مطلوقة لازم يابسة باش تتحل بسهولة ومتعذبكش فلمشينة ادلكيها شوية وغطيها لمدة10د ترتاح انا مرات مندلكهاش لانو العجينة كتكون يابسة تجي صعيبة فدليك نلمها ونغطيها طول ونخليها 10د ترتاح ونبدا العمل مباشرة.
ثم تقطعي العجينة قطع

ودائما رشي المايزينة هي تخلي الرشتة تجي خفيفة وحلي القطع بالحلال

مبعد فوتيهم في مشينة العجين في رقم2

ثم في رقم4 ونتي دائما ترشي المايزينة

ثم في رقم6

تحبوا فوتوهم غير في رقم 4و 6 نفس النتيجة في الاخير فوتيهم في الرقم الاخير تاع المشينة يعني تكون رقيقة كيما البقلاوة

مبعد تكوني وجدتي ازار فرشيه فوق البوتاجي او فوق طابلة وديري فوقه قطع العجين لحليتيهم في الرقم الاخير ومتلسقيهمش مع بعض كل قطعة وحدها

واذا درتي اكثر من طبقة تعاودي تحطي ازار بين طبقات العجين تخليها تنشف لمدة 10د.
مبعد حضري فنجان فيه الزيت وبانسو جيبي قطعة من العجين وادهنيها قليلا ملفوق بالزيت

وفوتيها في مشينة العجين في جهة الرشتة الرقيقة وادهني المشينة قليلا بشوي زيت باش العجين يخرج متفرق على بعضاه

وكتخرجي الرشتة دائما حطيها بشكل دائري كشغل كبة باش متتكسرش

حطيها مباشرة فلكسكاس وديريها تفور

ودائما كتفوريها هكذا ديري غير كمية صغيرة فلكسكاس باش متتعجنش بعد لتفور حطيها في قصعة وحليها بشوي بيديك حاولي متقطعيهاش غير بالعقل

تحبي تطيبيها وتاكليها مباشرة او تديريها فلمجمد لوقت الحاجة تلقايها واجدة

تحبي تجمديها ديري في كل كيس 1كلغ من الرشتة واغلقي مليح وديريها فلمجمد