طاجين لحلو بشباح السفرة

بعد بسم الله السلام عليكم

هذي وصفة لحلو بشباح السفرة على طريقتي
التحضير: ديري في طاجين شوية سمن + عود قرفة + رشة قرفة مرحية + اعواد قرنفل+ نجمة + 2مغارف ماء زهر + 2مغارف سكر 

قليها غير شوية او تقدري تمرقي بارد في بارد لما تمرقي وتغلي ديري البرقوق وخليها تطيب

 مبعد ضيفيلها الكمية اللازمة تاع سكر وخليها تعقد 

 شباح السفرة على طريقتي: كاس جوز الهند + 3/4 كاس سكر + فاني مغرف صغيرة خمارة

 خلطيهم وزيديلهم كاس بيض

مبعد ديري حوالي 3مغارف فرينة قيس ما يتماسك شوية الخليط  وهذا الوصفة تجي بجوز الهند احسن تجي خفيفة متتشبعش وباللوز والكوكاو تجي ثقيلة هذي وصفة دارنا وقديمة من وصفاتنا الخاصة

 مبعد ديريه في لمول تاع السيليكون اي شكل تحبيه او لمول تاع البابا او تقدري ديريه في مول كبير تاع موسكوتشو 

لما تديري اي بسكوي في مول السيليكون ويبقى فراغ عمريه بالماء باش ميتحرقش المول وهكذا تحافظي عليه

دخليهم يطيبوا حتى يحماروا مبعد اقلبيهم

انا عبرت بفنجان تاع قهوة حليب متوسط قطعتلي 9حبات  عادة نخدمهم ونخبيهم فلمجمد وقت الحاجة نجبدهم ونديرلهم المرق

مبعد حطيهم في وسط الصحن سقيهم مليح بمرق الحلوة وديري البرقوق على الجوانب وزوقي باللوز  والفواكه الموجودة عندك انا درت لوز والموز طبعتوا وردات وزوقت بيه ودرتوا دوائر ومرات ندير اناناس حسب الموجود

على فكرة البرقوق صنع منزلي كنتو خدمتو في موسم البرقوق رائع قليلة فيها احسن ب1000 مرة من البرقوق  ليتباع  وباذن الله اذا كان في العمر بقية راح نديروا بالتفصيل في موسمه

المرة القادمة باذن الله  راح نقدملكم حلو بالسوفلي .