دجاج مقلي بخلطة رائعة مع لابيري

بعد بسم الله السلام عليكم

التحضير: قطع من الدجاج حطيهم في اناء

مبعد اعصري عليهم شوية من عصير الليمون وغطيه وخليه جانبا

من جهة اخرى حضري خليط الترقيد:
ديري كاس حليب حضريه باللحظة متديريش حليب الاكياس لازم اللحظة يعني تحضري كاس ماء +2مغارف لحظة يولي حليب+معدنوس مقطع رقيق+ ملح + فلفل اسود + مغرف موتارد + مغرف فرينة

خلطيهم مع بعض

وحطي الدجاج فيهم

وخليه يترقد لمدة 1ساعة
خليط القلي: في كيس بلاستيك ضعي 5مغارف من حمص الكرنتيكا+ 4مغارف فرينة + 2 مغارف شابلير +ملح + فلفل اسود

خلطيهم يعني خضي الكيس لهذا درتوا فلكيس ليسهل تخلاط

مبعد ساعة صفي الدجاج من خليط الحليب

مبعد فوريه لمدة 20د الدجاج بلخف يطيب لانو كون تقليه مباشرة ميطيبش يجي نيئ من الداخل
مبعد رمديه في خليط القلي  واقليه

حتى يحمار مليح ثم قطريه في ورق ماص

اما تحضير لابيري بالبطاطة فهي طريقي المعتمدة والنتيجة رائعة
ديري البطاطة مقطعة في كوكوطة +ملح+ 2 سنات ثوم حب

ديريلها الماء اللازم واغلقي عليها حتى تطيب
لما تطيب نشفيها اونقصيلها كامل الماء ثم خبطيها بالباتور نعم الباتور طريقة روعة تخلي البطاطة تجي خفيفة متتشبعش وحذاري ترحيها بالميكسور او الروبو تجي معلكة وماشي بنينة

لما تخبطيها بالباتور تولي هكذا لانها طايبة كالزبدة فلكوكوط مبعد ضيفيلها الزبدة والفورماج انا  نديرها بقطعة شاف واذا كان عندك الخير ديري علبة فورماج تجي امممممممممممم

 وخبطي وولي زيدي الحليب الساخن تدريجيا وتخبطي حتى توصلي للقوام لتحبيه خفيفة بزاف او شوية

وقدميها كيما تحبي كاين ليحب يسقيها يديرلها مرق ابيض او احمر

دعوة طيبة في ظهر الغيب تكفيني.