skip to main |
skip to sidebar
بعد بسم الله السلام عليكم
هدا الوصفة كاين يسموها مادلان معسل وكاين يسموها سفنج في الكوشة هي وصفة سهلة جدا في التحضير وخفيفة
التحضير: 3بيضات+3مغارف سكر ضربيهم مليح+3مغارف زيتوضربي دائما+3مغارف حليب +3مغارف فرينة ونص باكي خمارة ورشة ملح وفاني خلطيهم وديريهم في لمول تاع السيليكون اي نوع عندك ديري فيه
ودخليهم يطيبوا حتى يحماروا خرجيهم وهما في المول سقيهم بالعسل
وخليهم 10د يشربوا ثم اقلبيهم بسهولة يتنحاو رشيهم من فوق بقطرات من العسل وقدميهم انا درتلهم جلجلان ملون .
بعد بسم الله السلام عليكم
التحضير: دجاج مرحي +ملح +فلفل اكحل+سكنجبير +رشة فلفل عكري+سنة ثوم
خلطيهم مبعد حلي العجينة المورقة مستطيل وديري فوقه الدجاج
ادهني الجوانب بالبيض ولوي مرتين
قطعي سيقار
ادهنيهم بالبيض او بصفار البيض مخلط بالقهوة وطيبيهم حتى يحماروا
بعد بسم الله السلام عليكم
ليوم جبتلكم وصفة لسوفلي العجينة تجي بنينة ومقرمشة اممممممممممم وهنا كاين عدة وصفات لسوفلي في المدونة
التحضير: 500غ فرينة+مغرف خميرة الخبز+مغرف لحظة+نصف مغرف كبيرة سكر+مغرف صغيرة ملح خلطيهم +كاس شاي زيت ديري فيه حبات زيتون اسود مقطع ارحيهم مع بعض وضيفيه للعجينة ولمي بالماء الدافئ تتحصلي على هذا العجينة
غطيها وخليها تخمر
الحشوة : درت صوص تومات +لحم مرحي طايب+طون طماطم وخلطتهم وتقدري ديري دجاج مفتت كاين حشوات مختلفة في مواضيعي طبعا ديري حسب ذوقك والموجود عندك
حلي العجينة واطبعي دوائر كبار تكون شوية رقيقة
ديري صوص
ثم ديري حبات بطاطة مقلية وقطعة فورماج
كاين لدرت فيهم جبن مرحي اغلقيهم بالفرشيطة
ادهنيهم بصفار البيض مخلط بالقهوة وزوقي بزيتون اسود او سانوج او جلجلان
دخليهم يطيبوا حتى يحماروا مليح
بعد بسم الله السلام عليكم
التحضير: 125غ زبدة+125غ سكر ناعم+فاني+ رشة ملح خلطيهم مليح +3مغارف لحظة وخلطي+نصف ملعقة صغيرة بكربونات او خمارة +الفرينة حتى تتلم .هذا الصابلي مفيهش البيض.
حليها واطبعي دوائر طيبيهم حتى يحماروا شوية لانو فيهم لحظة وبكربونات.
مبعد كي يبردوا لسقي كل 2 بالمعجون
القلاساج:بياض بيضة+3مغارف عصير ليمون+3مغارف ماء زهر+فاني خلطيهم +سكر ناعم مغربل تدريجيا ونتي تخلطي حتى تولي عجينة متماسكة ابداي اطلقيها بعصير الليمون
اقسمي القلاساج الى 3اجزاء جزء كبير ضيفيلو رشة كاكاو يولي لونه باج
وجزء صغير لونيه بالكاكاو الفاتح وديريه في كيس
وجزء بكاكاو الاسود او لعندك ملون اسود وديريه في كيس
اطلي القاطو بالقلاساج
ثم ديري نقاط عشوائية باللون البني الفاتح
ثم ديري خطوط بالاسود حول هذوك النقاط
يخرجلك شكل النمر اوleopard
خليه ينشف
وقدميه بالصحة والهنا .
تقدروا ديروا تشاراك بالعجينة السحرية او باي وصفة تفضلوها وديروا نفس القلاساج راه عندي صورته في الفيسبوك مبعد نحطهالكم .
لاتنسوا ان تدعوا لاولادي بالنجاح في الامتحانات.
بعد بسم الله السلام عليكم
هذا البسبوسة من اروع الوصفات لجربتهم متشبعوهش نتمنى تجربوها
التحضير:
الشربات: رطل سكر+نص لتر ماء+قطعة ليمون يغلي 10د وطفي عليه.
العجينة : 3بيضات +كاس سكر ضربيهم + نص كاس زيت وضربي دائما مع بعض+كاس رايب +قشور الليمون+رشة ملح وفاني +كاس سميد متوسط+كاس فرينة ونص+2خمارةخلطيهم ديريها في مول مدهون تطيب حتى تحمار كي تخرجيها رشيها بالماء زهر مبعد سقيها بالشربات تكون باردة وخليها تتشرب .
ثم زوقيهاكيما تحبي وقطعيها صدقوني روعة من الاحسن تستعملوا ارايب شوي جامد متستعملوش المايه.
بعد بسم الله السلام عليكم
التحضير:هذا الوصفة تاع مادلان النمر شكلها يجي منمر وسهل جداا في التحضير وصفات المادلان راه كاين بزاف الوصفات هنا في المدونة او اي وصفة معتمدينها ديروها واتبعوا الشكل فقط
لما تحضري عجينة المادلان نقضي قيس 2مغارف من العجينة لونيهم بالكاكاو يكون لون فاتح ونحي 2مغارف كذلك لونيهم بالكاكاو الداكن
تعمري العجينة في ليكيسات وديريهم في لمول المادلان
ثم ديري نقاط بالعجينة البنية الفاتحة
ثم ديري عليهم خطوط باللون البني القاتم
دخليهم يطيبوا حتى يحماروا
تقدري تكثري النقاط باش يجي منمر بزاف عندي انا هنا كثرت العجينة البيضاء تنفخوا بزاف وتقدميهم بالصحة.
كاين صابلي وتشاراك بقلاساج النمر كذلك جميل جداا راهم عندي الصور لاحقا نحطهم.
