حلوة بذوق بليدينا

بعد بسم الله السلام عليكم

هذا الحلوة تتحضر بفرينة الاطفال بلدين وبذوق العسل والحليب لانو كاين ذوق فواكه وخضر لازم عسل وحليب وهاهي العلبة

التحضير:250غ زبدة +نص كاس سكر قلاسي نخلطهم مليح+2 صفار بيض ونخلط دائما+ مغرف عسل + فاني ورشة ملح+نص علبة تاع بليدينا ونخلط+نص باكي خمارة +مغرف مايزينة +مغرف فرينة يعني بالتناوب نلموها مرة مغرف فرينة ومرة مايزينة حتى تتلم وتصبح عجينة طرية نخليها في الثلاجة ترتاح 10د.
نشكل كويرات نحشيهم بقطعة شكولا

نكورهم 

ندخلهم يطيبوا في فرن 180درجة لمدة 12د راهم ميطولوش في الطياب.

القلاساج:نحضر قلاساج بذوق القهوة
نذوب كمية من النسكافي في الماء +بياض بيضة+مغرف ماءزهر ونخلط +سكر قلاسي حتى تولي عجينة ندلكها مبعد نضيفلها مغرف عصير ليمون ونبدا نطلقها بخليط نسكافي مع الماء حتى تتحصل على قلاساج ميسيحش على الحلوة نجرب ونشوف نطلي حبات القاطو ونخليهم ينشفوا مبعد نمسحهم بالملمع الذهبي والقلاساج لبقى نزيدلوا كاكاووندير نقاط على حبة القاطو ونزوق بوردات بعجينة الديكور

نخليه ينشف وتقدري تطليه بالشكولا عوض القلاساج

وتقدميه

هذا الكمية تقطعلك 30حبة.